ශුද්ධෝත්තම ෆ්‍රැන්සිස් පාප් වහන්සේ පෙනහළු දෙකෙහිම නියුමෝනියා තත්ත්වයෙන් පෙළෙන අතර 88 හැවිරිදි ඔහුගේ සායනික තත්ත්වය “සංකීර්ණ” බව අඟහරුවාදා (පෙබරවාරි 18) වතිකානුව නිවේදනය කළා.
එබැවින් සති අන්තයේ අවසානය දක්වා උන්වහන්සේගේ සියලු කටයුතු අවලංගු කරන ලද බව එම නිවේදනයේ දැක්වෙනවා.
2013 සිට පාප් වහන්සේ ලෙස කටයුතු කරන ශුද්ධොත්තම පියතුමන් බ්‍රොන්කයිටිස් සඳහා ප්‍රතිකාර හා පරීක්ෂණ සඳහා සිකුරාදා රෝමයේ ගෙමෙලි රෝහලට ඇතුළත් කෙරුණා.
සඳුදා, වතිකානුව සඳහන් කළේ, පාප් වහන්සේගේ ශ්වසන පද්ධතියේ “බහු ක්ෂුද්‍ර ජීවී ආසාදනයක්” ඇති බවත් උන් වහන්සේට ලබා දෙන ප්‍රතිකාරවල වෙනසක් අවශ්‍ය වී ඇති බවත් ය. ඊයේ පස්වරුවේ උන්වහන්සේගේ පපු ප්‍රදේශය ආශ්‍රිතව සිදු කළ සී.ටී පරීක්ෂණයකින් පෙනහළු දෙකෙහිම නියුමෝනියා ආසාදිත තත්ත්වයක් පවතින බව අදාළ නිවේදනයේ සඳහන් වෙනවා..
කෙසේ වෙතත් ෆ්‍රැන්සිස් පාප් වහන්සේ යහපත් මනෝභාවයකින් පසුවෙන බව වතිකානුව සඳහන් කර තිබෙනවා. ෆ්‍රැන්සිස් පාප් වහන්සේ සිය පස්වන දිනය රෝහලේ විවේකීව යාඥා කරමින් පසු වූ බව තවදුරටත් සඳහන් වුණා.
‘පසුගිය පැය කිහිපය තුළ ෆ්‍රැන්සිස් පාප් වහන්සේ වෙත ලැබුණු සෙනෙහස සහ සමීපත්වයේ පණිවිඩවලට උන්වහන්සේගේ කෘතඥතාව’ යනුවෙන් නිවේදනයේ වැඩිදුරටත් දැක්විණි.
පසුගිය වසර දෙක තුළ ශුද්ධෝත්තම පාප් වහන්සේ ඉන්ෆ්ලුවෙන්සා සහ වෙනත් සෞඛ්‍ය ගැටලු හේතුවෙන් අවස්ථා කිහිපයකම පීඩා විඳි බව වාර්තා වුණා.
