අපේ රටට අති විශාල කීර්තියක් ගෙන ආපු, 1955 මිස් සිලෝන් කිරුළ දිනාගෙන, ඒ වගේම ඒ අවුරුද්දේම විශ්ව රූ රැජින තරඟයේ තුන්වැනියා බවට පත්වුණු, අසහාය රූ රැජිනියක් වුණු මොරීන් හින්ගර්ට් මහත්මිය අද (ජූලි 1) ජීවිතක්ෂයට පත් වුණා කියලා විදෙස් මාධ්‍ය වාර්තා කරනවා.
අපේ රටට ගෞරවයක් වූ ජීවිතය
1937 ජනවාරි 9 වැනිදා කොළඹදී උපත ලැබූ ඇය මිය යන විට 88 වැනි වියේ පසුවුණා. ජීවිතයේ අවසන් කාලය ඇය ගත කරලා තියෙන්නේ අමෙරිකාවේ කැලිෆෝනියා ප්‍රාන්තයේ ලොස් ඇන්ජලීස් නගරයේ.
දක්ෂතා පෙන්වූ චරිතයක්
මොරීන් හින්ගර්ට් කියන්නේ නිකම්ම රූ රැජිනක් විතරක් නෙවෙයි. ඇය නිළියක්, නර්තන ශිල්පිනියක්, නිරූපිකාවක් විදියටත් සේවය කරලා තියෙනවා. විශ්ව රූ රැජින තරඟයේ ඇයට හිමි වුණු ජයග්‍රහණයත් එක්ක, ඇය අපේ රට නියෝජනය කරමින් තානාපතිවරියක් විදිහටත් කටයුතු කරලා තියෙනවා. විශ්ව රූ රැජින තරගයෙන් ස්ථානයක් දිනාගත් ශ්‍රී ලංකාවේ පළමු සහ එකම තරගකාරිය ඇය වීම විශේෂත්වයක්!
ඇය හරිම දක්ෂ නර්තන ශිල්පිනියක්. ඒ නිසාම ලොස් ඇන්ජලීස් හි ෂ්‍රයින් ශ්‍රවණාගාරයේ සහ තවත් තැන් ගණනාවක ඇය තනි නර්තන ප්‍රසංග ඉදිරිපත් කරලා තියෙනවා. මේ දක්ෂතා නිසාම යුනිවර්සල් ඉන්ටර්නැෂනල් ස්ටූඩියෝ (Universal International Studio) සහ 20th සෙන්චරි ෆොක්ස් (20th Century Fox) වැනි ප්‍රසිද්ධ ආයතන ඇයව බඳවාගෙන තිබෙනවා.
ඇගේ රංගන දායකත්වය
ඉන් පස්සේ ඇය The King and I, Fort Bowie, Gun Fever, The Adventures of Hiram Holiday, Moroccan Halk Moth, Pillars of the Sky, Dangerous Search, Gunmen from Laredo, The Rawhide Trail සහ Captain David Grief වැනි ප්‍රසිද්ධ චිත්‍රපට සහ බ්‍රිතාන්‍ය රූපවාහිනී කතා මාලා ගණනාවකට රංගනයෙන් දායක වෙලා තියෙනවා.
මොරීන් හින්ගර්ට් කියන්නේ ඇගේ සුරූපී බවින් වගේම හැකියාවන් සහ දක්ෂතාවලින් ශ්‍රී ලංකාවේ නාමය ජාත්‍යන්තරයේ බැබල වූ අති විශිෂ්ට කාන්තාවක්. ඇයට නිවන් සුව ලැබේවා!
