මේෂ – අමතර ලැබීම්
හදිසි ගනුදෙනුවක් හේතුවෙන් සිතේ නොසන්සුන්තාවයක් ඇති කරයි. පවුලේ කටයුතුවලින් දුරස්වීමට සිදුවන කාලයකි. නිතර සමාජ සේවයට යොමුවන කාලයකි. රැකියා අපේක්ෂාවෙන් සිටින අයට සුබදායකයි. අමතර ලැබීම් හිමිකරන රැකියා මාර්ගවලට යොමුවීමට ඉඩ ඇත. තනතුරු අපේක්ෂාවෙන් සිටින අයට සුබදායකයි. ගතට සිතට වෙහෙස මහන්සිය ඇති කරයි. වරින්වර ඇතිකරන දණහිසේ ආබාධයකට ප්‍රතිකාර ලබා ගැනීමට සිදු වෙයි.
අය 06 වැය 05, ජය අංකය – 04
ජය වර්ණය – නිල්, සුබ දවස – බ්‍රහස්පතින්දා
වෘෂභ – මංගල යෝජනා
විවාහ අපේක්ෂාවෙන් සිටින අයට සුබදායක සතියකි. පොරොන්දු ගිවිසුමක් සාර්ථක කරන බවක් පෙනේ. හදිසි තීරණයක් තමාට අවාසිදායක වනු ඇත. වෙහෙසීම් බහුල කටයුතු කිහිපයක් යෙදීමට ඉඩ ඇත. කරගෙන යන රැකියාවට අමතර රැකියා මාර්ග යෙදීමට ඉඩ ඇත. රැකියාවේ කටයුතු වෙනුවෙන් දුර පළාතකට යාමට සිදුවෙයි. සෙම් දෝෂ බහුලවීමෙන් උගුරේ අමාරු, හිසේ ආබාධ ආදිය මතුවිය හැකියි. හදිසි වෛද්‍ය ප්‍රතිකාර පතන සතියකි.
අය 07 වැය 04, ජය අංකය – 09
ජය වර්ණය – කහ, සුබ දවස – බදාදා
මිථුන – තනතුරු වෙනසක්
වෙනදාට වඩා උත්සාහයෙන් කටයුතු කරන බවක් පෙනේ. තීරණ ගැනීමේදී දුරදිග සිතා බලන්න. ගේ දොර අඩුපාඩු කිහිපයක් සම්පූර්ණ කර ගැනීමට හැකිවෙයි. අලුත් රැකියා මාර්ගවලට හේතු සැලසේ. තනතුරු වෙනසක් සිදුවිය හැකි බවක් පෙනේ. වෙළෙඳ ව්‍යාපාරයක් ඇරැඹීමට යහපත් කාලයකි. විදෙස් රැකියාවකට සැලසුමක් ඇතිකර ගන්නා බවක් පෙනේ. වරින්වර ඇතිකරන මූත්‍රා අමාරු යටිබඩ සම්බන්ධ ආබාධ හේතුවෙන් ප්‍රතිකාර පතයි. සෙම් අමාරුවක් නිසා පීඩාකාරි බවක් ඇතිකරන සතියකි.
අය 07 වැය 05, ජය අංකය – 06
ජය වර්ණය – දම්, සුබ දවස – බ්‍රහස්පතින්දා
කටක – අලුත් රැකියා
ප්‍රමාද වූ කටයුතු කිහිපයක් සාර්ථක කර ගැනීමට මඟ සැලසේ. පොරොන්දු ගිවිසුමක් සාර්ථක කරන කාලයකි. පවුලේ කෙනකු පිළිබඳ සතුටුදායක පුවතක් අසන්න ලැබේ. පරම්පරාගත දේපළක් හිමි කරයි. රැකියාවේ කටයුතුවලින් කීර්තිය, ප්‍රසිද්ධිය ඇති කරයි. එමෙන්ම අලුත් රැකියා අපේක්ෂාවෙන් සිටින අයට සුබදායකයි. කරගෙන යන රැකියාවට අමතර සුළු සුළු ස්වයං රැකියා මාර්ගවලට යොමුවන කාලයකි. පපුව, උරහිස, සම්බන්ධ ආබාධයකට ප්‍රතිකාර ලබා ගැනීමට සිදුවෙයි. එමෙන්ම අතේ පයේ හිරිගතිය හේතුවෙන්ද ප්‍රතිකාර පතයි.
අය 06 වැය 04, ජය අංකය – 09
ජය වර්ණය – තැඹිලි, සුබ දවස – බදාදා
සිංහ – දුරගමනකට සැලසුමක්
තැන්පත් ධනය වැයවන සතියකි. පවුලේ අය සමඟ දුරගමනකට සැලසුමක් ඇති කරයි. ක්ෂණික තීරණ ගැනීමෙන් නොසිතූ පාඩු කීපයක් සිදු කරයි. රැකියා ස්ථානයේ කැපී පෙනෙන කාලයකි. මෙතෙක් අවහිරතා ඇතිකළ රැකියා ස්ථානයේ කටයුතු කිහිපයක් සාර්ථක ලෙස නිමාකර ගැනීමට හැකිවෙයි. පීනස වැනි සෙම් රෝග හිසට, පපුවට බලපෑමට ඉඩ තිබේ. වෙනදාට වඩා ජලය සම්බන්ධ කටයුතුවලින් පරිස්සම්වීම යහපත් වෙයි. ඇසක ආබාධයකට ප්‍රතිකාර ලබා ගැනීමට සිදුවෙයි.
අය 06 වැය 03, ජය අංකය – 02
ජය වර්ණය – දම්, සුබ දවස – බදාදා
කන්‍යා – හදිසි ගනුදෙණු
දුරදිග බලා කටයුතු කරන කාලයකි. ක්ෂණික තීරණවලට එළැඹෙන කාලයකි. රහසිගත ආදර සබඳතාවයක් ඇතිවීමට ඉඩ ඇති බවක් පෙනේ. හදිසි ගනුදෙණුවකට කටයුතු සැලසෙන බවක් පෙනේ. ආගම දහමට ළැදිව කටයුතු කරයි. වගකීම් බහුල රැකියා මාර්ගවලට හේතු ඇති කරයි. එමෙන්ම රැකියාවේ කටයුතු උදෙසා දුර පළාතකට යාමට සිදුවෙයි. ආයතන ප්‍රධානීන්ගේ ප්‍රසාදයට පත්වන අන්දමේ කරුණූ කිහිපයක් සිදු කරයි. උෂ්ණාධික රෝගයක් හේතුවෙන් පීඩා ගෙන දෙන සතියකි. වරින්වර හදිසි ප්‍රතිකාර පැතීමටද සිදුවේ. පරම්පරාගත රෝගයක් ඉස්මතු විය හැකි කාලයකි. හදිසි සෞඛ්‍යය පරීක්ෂණයකටද මුහුණපෑමට සිදුවෙයි.
අය 07 වැය 06, ජය අංකය – 07
ජය වර්ණය – තැඹිලි, සුබ දවස – සඳුදා
තුලා – දේපළ හිමිකමක්
ගේ දොර කටයුතු කෙරෙහි වෙහෙසෙන කාලයකි. පරම්පරාගත දේපළ හිමිකමක් පිළිබඳ බලාපොරොත්තුවක් ඇති කරයි. පවුලේ වැඩිහිටියකු පිළිබඳ සැලකිලිමත්විය යුතු කාලයකි. රැකියාවේ කටයුතු සම්බන්ධ දුරදිග සිතා බලන්න. ජලාශි‍්‍රත කටයුතු සම්බන්ධ රැකියා මාර්ගවලට හේතු සැලසේ. රැකියා ස්ථානයේ කැපී පෙනෙන අන්දමේ කටයුතු කිහිපයක් සිදු කරයි. වරින්වර ඇතිකරන පපුව සම්බන්ධ ආබාධයකට ප්‍රතිකාර ලබා ගැනීමට සිදුවෙයි. රුධිරගත සීනි මට්ටම කෙරෙහි වෙනදාට වඩා සැලකිලිමත් විය යුතු බවක් පෙනේ.
අය 07 වැය 03, ජය අංකය – 06
ජය වර්ණය – කහ, සුබ දවස – බ්‍රහස්පතින්දා
වෘශ්චික – විදෙස් රැකියා
තම වාසියට කටයුතු කිහිපයක් සිදුකර ගන්නා කාලයකි. පවුලේ දානමය කටයුත්තක් වෙනුවෙන් වෙහෙසෙයි. පිරිසුදුකමට, අලංකාරයට කැමැති කාලයකි. සති මැද කාලයේදි නිවෙසට අලුත් බඩුබාහිරාදිය මිලදී ගැනීමට අවස්ථාව උදා කරයි. විදෙස් රැකියා මාර්ගවලට හේතු සැලසෙන කාලයකි. රැකියාවේ ලියකියවිලි ගැටලුවකට මුහුණපායි. අලුත් ව්‍යාපාරයක් ඇරැඹීමට අවස්ථාව උදා කරයි. ක්‍රීඩා හා ව්‍යායාම්වලින් ශරීර සෞඛ්‍යය ආරක්ෂා කර ගන්නා බවක් පෙනේ. හදිස්සියේ ඇතිවන චර්මගත ආබාධයකට ප්‍රතිකාර ලබා ගැනීමට සිදුවෙයි.
අය 07 වැය 03, ජය අංකය – 04
ජය වර්ණය – රතු, සුබ දවස – ඉරිදා
ධනු – අඹුසැමි සුහදතාව
තීන්දු තීරණ ගැනීමේදී දුරදිග සිතා බලන්න. දරුවකුගේ ඉදිරි දියුණුව වෙනුවෙන් පියවර කිහිපයක් ගැනීමට සිදුවේ. හදිසි ලැබීම් හිමිකරන කටයුතු කිහිපයක් යෙදේ. අඹුසැමි සුහදතාවයට හේතු සැලසෙන කාලයකි. සුළු සුළු ලාභ හිමිකරන ස්වයංරැකියා මාර්ගවලට හේතු ඇති කරයි. දරුවන්ට දැනුම ලබාදීමේ රැකියා මාර්ගවල නිරතවන කාලයකි. නිතර නිතර ඇතිවන උදාසීන ගති, අතේ පයේ ඇතිවන හිරි ගතිය හේතුවෙන් ප්‍රතිකාර ලබා ගැනීමට සිදුවෙයි. අධි රුධිර පීඩනය කෙරෙහි සැලකිලිමත් විය යුතු බවක් පෙනේ.
අය 07 වැය 05, ජය අංකය – 07
ජය වර්ණය – තැඹිලි, සුබ දවස – බ්‍රහස්පතින්දා
මකර – වෙළෙඳ ව්‍යාපාර
නැතිවූ දෙයක් නැවත ලබා ගැනීමට හැකිවෙයි. තැන තැන ඇවිදිලි ඇති කරන සතියකි. විශ්වාසවන්ත කෙනකුගේ ඇසුරට පත්වන කාලයකි. රැකියාවේ කටයුතු කෙරෙහි පැවැති අවහිරතා කිහිපයක් මඟහැරී යයි. සෞන්දර්යාත්මක කටයුතු සම්බන්ධ රැකියා මාර්ගවලට හේතු ඇති කරයි. වෙළෙඳ ව්‍යාපාර කටයුතුවලට සම්බන්ධ වූ අයට සුබදායකයි. මූත්‍රා අමාරු, ගර්භාෂගත ආබාධ වරින්වර මතුවීට ඉඩ ඇත. හදිසි වැටීම් තැලීම්වලට ඉඩ ඇති කාලයක් බැවින් කල්පනාවෙන් පසුවන්න.
අය 05 වැය 06, ජය අංකය – 06
ජය වර්ණය – දම්, සුබ දවස – සිකුරාදා
කුම්භ – වාහන ගනුදෙනු
පොරොන්දු ගිවිසුමක් සාර්ථක කරයි. වාහන ගනුදෙනුවකට සැලසුමක් ඇති කරයි. විශේෂ හිතවත්කමකට අවස්ථාව උදා කරයි. රැවටීම් මුලාවීම්වලට හසුවිය හැකි කාලයක් බැවින් දුරදිග බලා කටයුතු සිදුකරන්න. හවුල් ව්‍යාපාරයකට අතගසන කාලයකි. ඇවිදිලි වැඩිකරන රැකියා මාර්ගවලටද හේතු සැලසෙන බවක් පෙනේ. දෑතේ මහන්සියෙන් කරන රැකියා මාර්ගවලට අවස්ථාව සැලසෙන සතියකි. කොන්දේ අමාරුවකට ප්‍රතිකාර ලබා ගැනීමට සිදුවෙයි. හදිසි ප්‍රතිකාර පතා දුර පළාතකට යාමට කටයුතු සැලසෙයි.
අය 07 වැය 04, ජය අංකය – 09
ජය වර්ණය – කොළ, සුබ දවස – ඉරිදා
මීන – නීති ගැටලුවකින් නිදහස
පැවැති නොසන්සුන්කාරී බව මඟහැරී යයි. පොරොන්දු ගිවිසුමක් සාර්ථක කරන සතියකි. අඹුසැමි ගැටලුවක් නිරවුල් කර ගැනීමට හැකිවෙයි. වෙනදාට වඩා පිනට දහමට ළැදි කාලයකි. අවිවාහකයන්ට සුබදායකයි. නීති ගැටලුවකින් නිදහස උදා කරයි. උගත්කමට සරිලන රැකියා මාර්ගවලට හේතු යෙදේ. තනතුරු ලාභ අපේක්ෂාවෙන් සිටින අයට සුබදායකයි. සුළු සුළු ස්වයං රැකියාවලට යොමුවීමට අවස්ථාව උදා කරයි. යටපත් වූ සෙම් රෝගයක් නැවත මතුවිය හැකිය.
අය 07 වැය 06. ජය අංකය – 04
ජය වර්ණය – රතු, සුබ දවස – සිකුරාදා
නෙරංජන් ආධිත්‍ය
070 2050 707
ඉරහඳ
