Skip to content 
නවක නිරූපිකාවක් වන කවීෂා කෞමිණි සමඟ සංවාදයකට අපි අද අවස්ථාව ලබාගත්තෙමු. ඇය නිරූපණ ක්ෂේත්‍රයට ආ ආකාරය, රඟපෑමට ඇති ආසාව සහ අනාගත සැලසුම් පිළිබඳව අපට පැවසූ කතාව මෙන්න.
📌 ඔබ නිරූපිකාවක්ද?
කවීෂා: “ඔව්, එහෙම කියන්න පුළුවන්. නමුත්, නිරූපණය මට විනෝදාංශයක් විදියට කරන දෙයක්. මගේ ප්‍රධාන වෘත්තිය නම් හෙදියක්. මේ වනවිට මම පෞද්ගලික රෝහලක හෙදියක් විදිහට සේවය කරනවා. ඒත්, කාලය හොඳින් කළමණාකරණය කරගෙන, නිරූපණ වැඩත් කරනවා.”
📌 නිරූපිකාවක් වීමේ ආශාව ආවේ කොහොමද?
කවීෂා: “මට පොඩි කාලේ ඉඳලාම නිරූපණය ගැන ආසාවක් තිබුණා. පාසල් ඉවර කරන කාලෙ ෆේස්බුක් එකේ නවකයින්ට නිරූපණ පාඨමාලා ගැන දැන්වීමක් දැක්කා. ඒ ගැන වැඩි විස්තර හොයාගෙන, ‘මිස් ඩ්‍රීම් බියුටි ක්වීන්’ නිරූපණ ඇකඩමියට සම්බන්ධ වුණා. එතැනින් මගේ ගමන ආරම්භ වුණා.”
📌 නිරූපණය විතරද? නැත්තම් රඟපෑමටත් කැමතිද?
කවීෂා: “අපෝ, මම බොහොම ආසයි රඟපාන්න! නිරූපණයට ආවෙත් රංගනයට අවස්ථාවක් හදාගන්න. චිත්‍රපටයක හෝ ටෙලිනාට්‍යයක රඟපෑම මගේ ලොකු හීනයක්. නමුත්, මට ගැළපෙන හොඳ චරිතයක් ලැබෙන්න ඕනෙ. බොහෝ නවකයින්ට අවස්ථා ලැබෙනවා, ඒත් ඔවුන්ට ක්ෂේත්‍රයේ රැඳී ඉන්න අමාරුයි. මට ඕනේ හොඳ නිර්මාණයක් හරහා මේ ක්ෂේත්‍රයේ රැඳී සිටීමට.”
📌දැනටමත් රඟපෑම් කරලා තියෙනවද?
කවීෂා: “ඔව්, මම දැනටමත් සංගීත වීඩියෝ කිහිපයක රඟපාලා තියෙනවා. ජනප්‍රිය ගායිකා හෂ්මිගේ ගීතයකටත් මම රඟපෑවා.”
📌 නිරූපණ ක්ෂේත්‍රය ගැන ඔබේ පවුලේ අය මොනවද හිතන්නේ?
කවීෂා: “මුලදී ඔවුන්ට අකමැත්තක් තිබුණා. නමුත් මගේ වැඩ දැක්කාම ඔවුන්ගේ අදහස වෙනස් වුණා. අදටත් මගේ වැඩ ගැන හොයලා බලනවා. මට ගැළපෙන දේවල් විතරයි ඔවුන් සලකා බලන්නේ. සමහරුන්ට නිරූපණ ක්ෂේත්‍රය ගැන විශ්වාසය නැහැ. නමුත්, තමන් නිවැරදිව හැසිරුනා නම්, ඒවා ගැන ප්‍රශ්නයක් නෑ. මගේ පවුලත්, පෙම්වතාත් දන්නවා මම හොඳින් හැසිරෙනවා කියලා.”
📌 ඉස්සරහට කරන්න තියෙන සැලසුම් මොනවද?
කවීෂා: “මගේ වෘත්තිය හෙද වෘත්තිය. ඒත්, දැන් මට වැඩිපුරම ආසාව තියෙන්නේ රඟපෑමට. ඉක්මනින්ම මට චිත්‍රපට හෝ ටෙලිනාට්‍යයකට සම්බන්ධ විය හැකි අවස්ථාවක් ලැබෙයි කියලා මම බලාපොරොත්තු වෙනවා!”
