ඉන්දියාවේ සහ දකුණු ආසියාවේ ධනවත්ම පුද්ගලයා විදියට Reliance Industries සමාගමේ සභාපති සහ කළමනාකාර අධ්‍යක්ෂ මුකේෂ් අම්බානි දිගින් දිගටම ඉන්නවා. ඔහුගේ වත්කම ඩොලර් බිලියන 118ක් විදියටයි ගණන් බලා තිබෙන්නේ.
මුකේෂ් අම්බානිගේ මේ දැවැන්ත වත්කම ඉන්දියාවේ අසල්වැසි රටවල ඉන්න අනිත් ධනවත්ම පුද්ගලයින්ට සාපේක්ෂව කොහොමද කියලා බලමු.
පාකිස්තානය: ෂාහිඩ් ඛාන් ($ බිලියන 13.5 )
ඇමරිකාවේ ජීවත් වෙන, පාකිස්තාන සම්භවයක් තියෙන ෂාහිඩ් ඛාන් තමයි පාකිස්තානයේ ධනවත්ම පුද්ගලයා.
ඔහුට තමන්ගේ Flex-N-Gate කියන ඔටෝමොබයිල් සමාගම, NFL ජැක්සන්විල් ජගුවර්ස් සහ ෆුල්හැම් F.C. වගේ දේවල් අයිතියි.
පාකිස්තානයේම ඉන්න ධනවත්ම ව්‍යාපාරිකයා විදියට සඳහන් වෙන්නේ ඩොලර් බිලියන 3ක වත්කමක් තියෙන මියන් මුහම්මද් මන්ෂා.
බංග්ලාදේශය: මොස්සා බින් ශම්ෂර් ($ බිලියන 12)
බංග්ලාදේශයේ ධනවත්ම පුද්ගලයා විදියට සැලකෙන්නේ මොස්සා බින් ශම්ෂර්. ඔහු ඩොලර් බිලියන 12ක වත්කමක් තියෙන බව කියනවා.
ඒත් මේ වත්කම Forbes වගේ ජාත්‍යන්තර මූල්‍ය ආයතන වලින් තවම තහවුරු කරලා නැහැ. මොහු ප්‍රධාන වශයෙන් ජාත්‍යන්තර ආයුධ වෙළඳාමෙන් තමයි සල්ලි හොයලා තියෙන්නේ.
නේපාලය: බිනෝද් චෞද්රි ($ බිලියන 1.6)
නේපාලයේ ඉන්න එකම බිලියනපතියා තමයි බිනෝද් චෞද්රි. ඔහුගේ වත්කම ඩොලර් බිලියන 1.6ක්. Wai Wai නූඩ්ල්ස් බ්‍රෑන්ඩ් එක ගැන දන්නවනම් මේ නම අහලා ඇති.
ඔහුගේ Chaudhary Group (CG Corp Global) සමාගම ආහාර, ඉලෙක්ට්‍රොනික්ස්, හෝටල් සහ දේපළ වෙළඳාම් වගේ ක්ෂේත්‍ර ගණනාවක ක්‍රියාත්මක වෙනවා.
ශ්‍රී ලංකාව: ඉෂාර නානායක්කාර ($1.6 බිලියන)
2025 වෙනකොට ශ්‍රී ලංකාවේ ධනවත්ම පුද්ගලයා විදියට ධම්මික පෙරේරාව පරදවලා ඉෂාර නානායක්කාර ඉදිරියට ඇවිත් තියෙනවා.
ඔහුට ඩොලර් බිලියන 1.6ක වත්කමක් තියෙනවා. ඔහු LOLC Holdings කියන මූල්‍ය සහ ආයෝජන සමාගමේ නායකයා විදියට වැඩ කරනවා. මේ සමාගම ලෝකයේ රටවල් 10කට වඩා වැඩි ගාණක ක්‍රියාත්මක වෙනවා.
මුකේෂ් අම්බානිගේ වත්කම මේ හැමෝටම වඩා ගොඩක් වැඩියි. ඔහුගේ ඩොලර් බිලියන 118ක වත්කම, පාකිස්තානයේ ෂාහිඩ් ඛාන්ගේ වත්කමට වඩා 10 ගුණයකටත් වඩා වැඩියි.
ඉතින් ව්‍යාපාර වල විශාලත්වය, ජාත්‍යන්තර බලපෑම සහ සත්‍යාපනය කරපු වත්කම ගැන බැලුවම දකුණු ආසියාවේ අම්බානි තවමත් අසහායම මුදල් බලවතා විදියට තමයි ඉන්නේ.
