ඒක වුනේ කොහොමද කින්ද මන්ද මිනිස්සුන්ට අදාල වෙන්නේ නෑ. මේ දේවලුත් එක්කම මේ බඩේ ඉන්න දරුවාගේ තාත්තා වෙන කසාදයක් කරගෙන ඉන්න මිනිහෙක්නම් ඒකේ අවලාදේ අහන්න වෙන්නෙත් මේ බඩ දරු අම්මාටම තමයි. එතකොට අර කලින් කියූ වල් කතාවට අලුත් වචනයකුත් එකතුවෙනවා. ඒ තමා “හොරගෑනි” කියන නාමකරනය.
මේ එක වචනයක්වත් සමාජයේ පිළිගත් වචන නෙවේ. ඒ වචන තනිකරම නින්දාසහගත වචන. ඒත් මේ අපහාස ඔක්කොම විදින්න වෙන්නේ ගැහැණියටම වීමයි මෙහි අසාදාරණය වෙන්නේ.
ගෙදර ගෑනි ඉන්නකොට කෙල්ලන්ව රවටා නිදි වැදුන අර වලත්‍ත පිරිමියාට කවුරුත් මොකුත් කියන්නේ නෑ.
ඉතින් මෙන්න මේ අසාධාරනයට ලක් වුන බියගම වෙලඳකලාපේ හිටිය කෙල්ලක් තමයි රත්නාවලී කියන්නේ. රත්නාවලීගේ ශෝර්ට් නේම් එක වුනේ “රතී”. ගමෙන් නගරයට එන රති තනි කාමර බෝඩිමක නැවතිලා කොළඹ නිදහස් ජීවිතයක් ගත කරන්නේ මහා ලොකු හීන ගොඩක් හිතේ තියාගෙන.
රතීගේ ලෝකේ හරි පුංචි එකක්. එයා ආසයි පුංචි දරු පැටියෙක්ගේ අම්මා කෙනෙක් වෙන්න. එයා ආසයි උදේ පාන්දරින් නැගිටලා මහත්තයාට තේ එකක් හදලා දෙන්න. එයා ආසයි හැම ගෑනු කෙනෙක්ම ආස කරන ලස්සන පවුල් ජීවිතයකට. මෙන්න මේ නිසා එයා එයාට ගැලපෙන පෙම්වතෙක්ට එයාගේ ආදරය පූජා කරන්න තීරණය කරනවා.
ලස්සන හුරුබුහුටි කෙලිපොඩ්ඩක් වූ රතීගේ මේ අහිංසක අවංක වූ ප්‍රේමයේ හිමිකාරයා වෙන්නේ ශාන්ත. යුධ හමුදා සේවකයෙක් වූ ශාන්ත ගමක හැදුන කොල්ලෙක් නිසා රතීට හොඳට පෑහුනා. ඒ පෑහීමේ ප්‍රතිඵලයක් විදිහට රතී ජීවත්වුන ලෑලි බෝඩිමේ කිරි කිරි ගාන ඇදේ ඔහුටත් ඈ සමගින් යහන් ගතවෙන්නට රතීගේ අවසරය ලැබෙනවා.
රතීගේ ඊලග බලාපොරොත්තුව තමයි ශාන්තගේ බිරිඳ වෙන එක. ඉතින් ශාන්තගේ ආදරයත් එක්ක ඇලී සිටි රතීට, ශාන්තගේ බිරිඳ වෙන එක ගැන සැකයක් දැනෙනෙන්නේ නෑ. ඒ නිසාවෙන්ම ශාන්ත එක්ක රති සැප විදින එක ගැනත් රතී දෙවරක් හිතන්නේ නෑ.
මේ අල්ල පනල්ලේ ඕං රති ගැබ් ගන්නවා. ඒකත් රතී වැඩිය හිතන්නේ නෑ. මොකද එයා ගැබ් ගන්නේ එයා බදින්න ඉන්න පිරිමියාගෙන් නිසා. ඒත් දින සති ගතවෙනකොට ශාන්තගේ වෙනස්කම් දකින රතීට මොකක් හෝ අමුත්තක් වේගෙන එන බව වැටහෙන්නට පටන් ගන්නවා.
මේ ගැන හොයන රතීට දැනගන්නට ලැබෙන්නේ ශාන්ත කියන්නේ කසාද ගෑනියෙක් සහ දරුවෙක් ඉන්න දරුපවුල් කාරයෙක් වගයි.
දෙයියනේ දැන් මොකද කරන්නේ. ඇය ජීවත්වන සමාජය අනුව දැන් රතීට විදින්න වෙන අවලද ගැහැට ගැන ආයේ අමුතුවෙන් කියන්න ඕන වෙන්නේ නෑනේ. ඒ අස්සෙම මේ බොරුකාර ශාන්තයා රතීගේ දරුවාව ගබ්සා කරන්න කියලා ඉල්ලන්න පටන් ගන්නවා.
මෙන්න මේ ඉල්ලීමත් එක්කයි රතී ඇගේ අනාගත ගමන කොහොම විය යුතුද කියලා තීරණය කරන්න පටන් ගන්නේ.
ඉතින් මෙතැනින් පසුව රතීගේ ජීවිත කතාව කෙසේ වෙනස් වේවිද කියලා බලන්න නම් ඔයාලට 2003 වසරේ තිරගත වූ ඉනෝකා සත්‍යාංගනී විසින් අධ්‍යක්ෂනය කළ , රතී ලෙස දමිතා අබේරත්න රඟපෑ සම්මානනීය චිත්‍රපටියක් වූ “සුලං කිරිල්ලී” චිත්‍රපටිය බලන්න වෙනවා.
